នៅថ្ងៃទី ៣០ ខែឧសភា ឆ្នាំ ២០២៤ ឧកញ៉ា​បណ្ឌិត សេង វណ្ណារិទ្ធ អគ្គនាយក នៃសាលាអន្តរជាតិចុងអ៊ីង បាននាំយកថវិកាចំនួន ១២,០០០,០០០ រៀល (ដប់ពីរលានរៀល) ដែលជាការរួមចំណែកដោយស្ម័គ្រចិត្តពីបុគ្គលិកជាង ៦០០នាក់ សិស្សានុសិស្សនិងអ្នកអាណាព្យាបាលគ្រួសារចុងអ៊ីងទាំងអស់ ដើម្បីបរិច្ចាគជូនមូលនិធិគន្ធបុប្ផាកម្ពុជា។

ការបរិច្ចាគដ៏មានតម្លៃនេះ មានគោលបំណងចម្បងក្នុងការគាំទ្រដល់បេសកកម្មរបស់មូលនិធិគន្ធបុប្ផា ក្នុងការផ្ដល់សេវាសុខភាពពិនិត្យ និងព្យាបាលដល់ទារក និងកុមារកម្ពុជាទូទាំងប្រទេស ដោយឥតគិតថ្លៃ មិនរើសអើង និងមានគុណភាពខ្ពស់ជាប្រចាំ។ នេះជាកិច្ចសហការមនុស្សធម៌មួយ ដែលបង្ហាញពីទឹកចិត្ត និងស្មារតីសង្គមរបស់សាលាអន្តរជាតិចុងអ៊ីង។

សាលាអន្តរជាតិចុងអ៊ីង សូមថ្លែងអំណរគុណយ៉ាងជ្រាលជ្រៅចំពោះមូលនិធិគន្ធបុប្ផា ក្រុមការងារ មាតាបិតា អ្នកអាណាព្យាបាលសិស្សានុសិស្សទាំងអស់ ដែលបានឧបត្ថម្ភដល់បេសកកម្មដ៏មានតម្លៃនេះដើម្បីការពារជីវិតកុមារ និងស្ថាបនាអនាគតដ៏រីកចម្រើនសម្រាប់កម្ពុជា។

សូមជម្រាបថា សាលាអន្តរជាតិចុងអុីង គឺជាសាលាអន្តរជាតិឈានមុខគេដែលផ្តល់ការអប់រំចំណេះទូទៅ បីភាសាគឺ ខ្មែរ អង់គ្លេស និងចិន ទទួលសិស្សចាប់ពីអាយុ២ឆ្នាំ ដល់ថ្នាក់ទី១២ ។​ ចុងអុីង ផ្តល់បរិយាកាសសិក្សាដែលមានសុវត្ថិភាព ផាសុខភាព និងសម្ភារៈបរិក្ខារទំនើបទាន់សម័យ។កាន់តែពិសេសនោះ សាលាអន្តរជាតិ ចុងអុីង ផ្តល់ការអប់រំលំដាប់ពិភពលោក សញ្ញាប័ត្រទទួលស្គាល់ដោយចក្រភពអង់គ្លេស កម្មវិធីសិក្សា៣ភាសា ដែលផ្តោតសំខាន់លើសុខុមាលភាព ជំនាញទំនាក់ទំនង បច្ចេកវិទ្យាAI គំនិតច្នៃប្រឌិត និងសមត្ថភាពប្រកួតប្រជែងកម្រិតពិភពលោក។ អ្វីដែលជាចំនុចសំខាន់នោះគឺ ចុងអុីង បណ្តុះបណ្តាលបុត្រធីតាលោកអ្នកឱ្យក្លាយទៅជាមនុស្សល្អ អ្នកដឹកនាំគំរូ និងសហគ្រិនឆ្នើមនៅថ្ងៃអនាគត៕

ប្រភព : គេហទំព័រឧកញ៉ាញូស៍